Dashuria e parë-Wislawa Szymborska

 

Thonë se
dashuria e parë është ajo më e rëndësishmja.
Kjo është shumë romantike
por nuk është rasti im.

Kishte dhe nuk kishte diçka mes nesh.
Lindi dhe u shua.

Nuk më dridhen duart
kur përplasem me kujtime të vogla,
ose me një pirg letrash të mbështjella me spango
– as edhe me një fjongo.

Takimi ynë i vetëm pas gjithë këtyre viteve është një bisedë mes dy karrigeve në një tavolinë të ftohtë.

Dashuritë e tjera
ende marrin frymë thellë brenda meje.
Kurse kësaj i mungon fryma për të psherëtirë.

Por megjithatë, mu ashtu siç është,
mund të bëjë atë që pjesa tjetër nuk arrin ende ta bëjë:
ashtu e pakujtuar,
madje, as e ëndërruar,
më mëson me vdekjen.

Përktheu: Arlinda Guma

Skulptura: Chistopher M. Bednansk