Natë e thikëve të gjata-Sueton Zhugri

Si esencë e trupit mbetet hija.
Absolutja e zërave zbutet gjer në përgjakje.
Të ikur duhet të ishim përtej kësaj pike.
Si kartagjenas që u shkulën dhe flokët para shfarosjes.
Si bija të bardha që mbinë humnerave
pa rënë dorës së turkut.

A vjen krimi si natyrë e gjërave,
zinxhir ushqimor i dhëmbëve të përsëritjes?

Së paku fundin ta mbushnim
me sy e etje
si gojët e peshqve mbledhin mushkërive
mbytjen e stëresë.

Pastaj le të vinte bërthama e atomit
Le të vinin thikat e gjata.

21.7.2017