THURIMA-Jorge Luis Borges

 

Në oborrin e dytë
bie nga çezma, rregullisht, një pikë,
fatale si vdekja e Cezarit.
Edhe njëra edhe tjetra i përkasin thurimës
që përfshin rrethin pa parim e pa qëllim,
spirancën e Fenikisë,
të parin ujk dhe të parin qengj,
datën e vdekjes sime
dhe teoremën e humbur të Fermatit.
Këtë thurimë hekuri,
stoikët e menduan të bërë prej një zjarri
që vdes e ringjallet, si Feniksi.
Është pema e madhe e shkaqeve
dhe pasojave që degëzohen;
mbi gjethet e saj gjenden Roma dhe Kaldeja
dhe ajo që shohin fytyrat e Janusit.
Universi është njëri nga emrat e saj.
Askush nuk e ka parë ndonjëherë
dhe askush nuk mund të shohë gjë tjetër.

 

Përktheu: Alket Çani