Tridhjetë e tre emrat e Zotit- Marguerite Yourcenar

 

1. Deti n’agun e parë.

2. Gurgullim’ e ujit
mbi faqet e gurta
t’shkëmbinjve.

3. Puhi e detit,
netëve,
mbi ishull.

4. Bleta.

5. Flatrími trekëndor
i mjelmave.

6. Qengj’ i porsalindur
prej ma t’bukurit dash,
nji dele.

7. Turiri butalosh
i lopës,
turiri i egër
i demit.

8. Turiri
durimplotë
i kaut.

9. Kuqëlím’ i zjarrit
n’vatër.

10. Deveja e çalë
që përshkoi qytetin
e zhurmshëm,
mespërmes,
derisa u shua.

11. Bari
Aroma e barit.

12. (një skicë e tij,
sikur yjësi, mijëra vezullime)

13. Toka pjellore.
Rëra dhe hiri.

14. Çafka, që
në terrin e natës
pret e mpitë,
n’ag shuan urinë.

15. Peshk’ i njelmët
frymon për t’fundit herë
në fytin e çafkës.

16. Duart
ndiejnë sendet.

17. Lëkura –
çdo centimetër i saj.

18. Shikimi –
çka gjakon.

19. Nëntë dyert e perceptimit –
Parajsa dhe Ferri.

20. Kraharori i njeriut.

21. Tingulli i një violine,
një motiv që luhet me çifteli.

22. Një pije e ftohtë
ose e nxehtë,
me hurba.

23. Buka e mbrume.

24. Lulet që çelin tokën
n’pranverë.

25. Gjum’ i paqtë –
n’shtrat.

26. Një i verbër
këndon një ninullë
për fëmijën e çaltë.

27. Kali rend i lirë.

28. Zonja me kone.

29. Devetë që
shuajnë etjen,
tok me t’vegjëlit e tyre,
në çurgun e rrallëgjendur.

30. Rrezet e para
që përshkëndritin
mbi liqenin
gjysmë t’akullt.

31. Vetëtima
e heshtur
Shkreptima
buçitëse.

32. E bekuara
heshtje
mes dy miqve.

33. Një zë
jehon kah lindja,
depërton veshin e djathtë,
bëhet këngë.

Përktheu: Iva Çaushaj