TË VARFRIT-EDUARDO GALEANO

 

Ekspertët, varfologët,
i studiojnë dhe na japin të dhëna të përditësuara.
Çfarë nuk hanë,
ku nuk punojnë,
sa janë,
sa nuk peshojnë,
sa nuk janë të gjatë,
çfarë nuk kanë,
çfarë nuk mendojnë,
çfarë nuk votojnë,
në çfarë nuk besojnë.
Na ngelet të dimë vetëm përse të varfrit janë të varfër,
pa tokë, pa shtëpi, pa rrugë.
Mos ndoshta të varfrit janë të varfër
sepse uria e tyre na ushqen
dhe lakuriqësia e tyre na vesh?
E ç’do të ishim ne pa të varfrit?

______

Nga libri: “Askushët“

Përktheu: Bajram Karabolli