Përqafim-Merita Paparisto

Përqafim-Merita Paparisto

Përqafimi është një gjë e thjeshtë
me krahë të mbështjellë 
në shpatullat e tjetrit,
ka fijet e brinjëve 
të mbivendosura mbi njëra-tjetrën,
ka një zjarr të vogël që merr frymë
në oxhak të kraharorit…
dhe asgjë më…

Gropëza midis qafës dhe supit
është lugina e vogël e mallit,
ku koka lëshohet e papushtetshme,
prehër i kujtimeve të ëmbla
mbledhur në hojet e kohës së shkuar.

Dorëzohu në përqafim dhe do të shohësh,
që një shkurrëzë trëndafili e egër 
do të mbijë në gropëz të mallit.