DALLËNDYSHJA-Xhevdet Bajraj

 

Mbrëmë ishte party i shkëlqyeshëm
kishte shumë njerëz
dhe shumë alkool
por nuk jam dehur

Kah ora dy e mëngjesit
nuk kishte mbetur njeri i gjallë
nëpër sallonin e shtëpisë
parakaloi një tigër
ndërsa qeni i zonjës së shtëpisë
u shndërrua në kanarinë
dhe doli nga dritarja
duke fluturuar

Nëpër të njëjtën dritare
hyri një dallëndyshe
më mori me sqep
si të isha një fije kashte
dhe më dërgoi në pranverën
nga e cila më kishin përzënë
qëmoti.

 

Shkëputur nga vëllimi: “Me zemër në qese najloni”, Sh. B. “Armagedoni”, 2021