Bertolt Brecht – Lavdi të nxënit

Bertolt Brecht – Lavdi të nxënit

 

“Mëso më të thjeshtën e gjërave! Ata,

Të cilëve u ka ardh’ dita,

S’janë kurrë tepër vonë!

Mëso ABC-në; s’mjafton, vërtet,

Megjithatë mësoje! Mos u pezmato!

Fillo! Gjithçka duhet të dish!

Ty të takon të jesh në krye.

 

Mëso, o njeri i bujtinës!

Mëso, o njeri në birucë!

Mëso, o grua tenxheresh!

Mëso, o shtatëdhjetëvjeçar! Ty të takon të jesh në krye!

Mos e braktis shkollën pa çati!

Fut ca dije në xhep, ti që ngrin në acar!

 I uritur, rrok një libër: është një pushkë.

Ty të takon të jesh në krye.

 

Shok, mos ki frikë të pyesësh.

Dëgjo njëqind vetë,

Por pastaj shih e bëj vetë!

Atë që s’e di,

S’e di, flije mendjen.

Por mos bëj hesape pa hanxhinë:

Ngase në fund të shkon ty fatura.

Vëre gishtin mbi çdo zë,

Pyet se për çfarë bëhet fjalë.

Ty të takon të jesh në krye”.

Shqipëroi: Edon Qesari