Të verbrit në protestë-Petraq Risto

 

Të verbër… 

Errësira na ka mbledhur në një shesh për protestë

të tjerëve u dukemi kuaj pak orë para vrasjes

Do të na flas një i verbër tjetër

Thonë Dritës do t’i bëjë ftesë:

të paktën ta shohim në Parajsë.

Nëse dhe në Parajsë do të jetë kështu:

Qytete me rrugë të kthyera në bastunë

nëse në Parajsë s’do të përkthehemi në blu 

dhe drita s’do na kthehet në furtunë

atëherë merreni Zotin tonë

futeni në një labirint drite

të mos verbohet nga errësira.