Në kërkim të vdekjes së bukur-Erlind Sulko

Në kërkim të vdekjes së bukur-Erlind Sulko

 

Doktori i tha Krenarit:

të ka mbetur edhe një javë jetë.

 

Ai la tek gota e ujit një letër

për djalin e mërguar

dhe e braktisi krevatin e spitalit,

pa përshëndetur askënd.

 

Para oborrit të spitalit,

infermierët  pinin cigare

e bisedonin për rritjen e rrogës.

Atje pranë, disa romë po ngrohnin duart

duke djegur plehra.

 

Krenari u nis drejt detit,

me këpucët e zgjidhura

dhe këmishën e shklyer.

U zhvesh krejtësisht

dhe e hodhi gjithçka në rërë.

Vrapoi i marrosur drejt kaltërsisë së paanë

drejt përsëritjes së pafundme të dallgëve

për mos u kthyer më kurrë.