Engjëj dhe portokaj-Edvin Thomollari

 

Portokajve që lagen nga shiu nëpër tezga,
u kalojnë pranë engjëj bipolarë,
që vazhdojnë rrugën nëpër shi.
Dhe ecin mbi lëkurën e qytetit,
që i ngjan lëkurës së portokajve,
shiu lag arkat përplot
dhe mushamanë e shitësit.
Engjëjt e tejdukshëm,
në plazmën e mjegullës, lindin të tjerë.
Në mëngjes kur bie shi,
në kufirin me qytetin futen në metro
dhe dalin në krahun tjetër.
Ku janë njerëzit si ne,
si shitësi me mushama,
që pret shiun shtruar?
Dikush të blejë gjithë portokajtë
me çmim të favorshëm
dhe t’i japë fund ditës së shiut,
për portokajtë dhe engjëjt.