SHI NATE NË CHICAGO,
I BUKUR, I DHEMBSHUR… Visar Zhiti

Shi nate në Chicago,
i bukur, i dhembshur,
rrugëve bie dhe brenda nesh,
kaq shumë vezullues sikur thërrmohen yje
ëndrrave në Qiell.

Ti e solle këtë shi
të bukur, të dhembshur
për një lindje të re dite
si të gjitha mëngjeset e 30 gushtit
që vijnë bashkë me ty.

Dhe çdo gjë e ardhur nga lartësitë
qiellore
e shenjtë është, o bir! Po këtë qytet

kush e solli te ne,
erërat dhe dallgët e tua? Kujt i the
të na thërriste?

Një pikë loti këtu
bëhet ky liqen, ti e di, më i madhi
në botë, –
vetëm një pikë loti kështu…
dhe jo vetëm liqen…

Brinjët e mia bëhen brigje.

Ky shi i natës në Chicago bashkon
kujtesën
me përjetësinë,
që s’duket si horizontet, si çdo fund,
që e shohin të tjerët.

Po ta ndezim nga një cigare si dikur,
nga paketa e qiellit
dhe tre qirinj ndizen vetvetiu tani
në të gjitha kishat si në shpirt.


Chicago, 30 Gusht, 2024