Udhëzim mbi funksionimin dhe mirëmbajtjen e një zemre të thyer-Sueton Zhugri

 

Fërkim me lëng

buzëqeshjeje të shtirur

tre herë në ditë.

Pastrim nga pluhuri i sikleteve

të puthjeve të huaja

në mëngjes e mbrëmje.

Ndalim në mjedisin paramendor dhe ftohje të ndjeshmërisë së korridoreve shpirtërore.

Vajisje me vaj moskokëçarje të valvolave të lumenjve të kuq, (sidomos aortës hënore gjatë netëve me yje).

Hekurosje me të kuq e lëkurës së buzëve psherëtitëse.

Armatim me bajonetat blu të cinizmit

dhe kalitje e syrit të zverdhur të zvetënimit.

Katranosje e syrit magjik të derës

së kureshtjes dhe vetëpërmbajtjes.

Arratisje e përkohëshme ose e përhershme në dhomën me mbishkrimin e mëposhtëm

dhe gjysmë të gërvishur:

“Kujt i plasi zhaponeja”

Zhdramatizim dhe përbuzje e të gjithësishmes dhe të papriturës,

të quajtur dikur hyjnore.

E për ta mbyllur,

mosdëgjimi për fare i kësaj fjalie:

“Prekje e heshtur nën lëkurë”

19.9.17