Do të doja një dashuri të madhe-Sueton Zhugri

 

.. aq të madhe sa mos ta nxinte
fleta ku po shkruaj,
as syri yt,
të derdhej ajo
si ujë mbi tavolinë,
ose si lot mbi faqen tënde.

Një dashuri prej shiu që përmbyt fletët
Dashuri bombë që hedh në erë dhe retë
Dashuri që nuk përulet, por turfullon për hall të vet
Dashuri amfibe që noton brenda teje pa u pikasur
Dashuri – algjebër me probleme të pazgjidhshme
Dashuri me parzmore që nuk çahet në puthje të parë, e as në të fundit
Me veshje antiplumb ndaj fyerjes
Me brinjë që i thyhen por nuk i dhëmbin
Që të mban pa gjumë si dhëmb i prishur
Një si kafshë shtëpiake që të ngroh kur të sheh të trishtuar dhe të troket me putra në qenie
Një lloj kujtese që zgjon edhe të vdekurit
Monedhë e flakur në erë për të blerë furtunë…

Jo një dashuri si qerthull pervers kotësie,
Artikull i rëndomtë në një merkato të shtirurish.

Unë do të doja dashurinë e madhe
atë dashurinë që sa herë të shoh në sy,
njom si ëndërr zemrën time…

3.11.2023