Pyetje mbi engjëjt-Billy Collins

Nga të gjitha pyetjet që ju mund të doni të bëni mbi engjëjt,
e vetmja që e dëgjoni përherë është
se sa prej tyre mund të vallëzojnë mbi kokën e një gjilpëre.

Asnjë kureshti për mënyrën sesi e kalojnë ata kohën e përjetshme
përveç rrotullimit të Fronit duke kënduar psalmet në latinisht
ose duke i dorëzuar një kore buke një vetmitari në tokë
apo duke udhëhequr një djalë dhe një vajzë nëpër një urë druri të kalbur.

A fluturojnë ata përmes trupit të Zotit dhe a dalin duke kënduar?
A përkunden si fëmijët nga menteshat e botës shpirtërore, duke i thënë emrat e tyre parsh dhe mbrapsht?
A ulen ata të vetëm në kopshte të vogla duke ndryshuar ngjyrat?

Po për zakonet e tyre të gjumit, për pëlhurën e rrobave të tyre,
për dietën e tyre prej drite hyjnore të pafiltruar?
Çfarë ndodh brenda kokave të tyre të ndritshme?
A ka ndonjë mur përmes të cilit këto prani të gjata mund të shohin ferrin?

Nëse një engjëll do të binte nga një re,
a do të linte ai një vrimë në një lumë
dhe vrima do të lundronte pafundësisht
mbushur me shkronjat e heshtura të çdo fjale engjëllore?

Nëse një engjëll do të dërgonte postën,
a do të mbërrinte ai me një ngut verbues krahësh
apo thjesht do të merrte pamjen e postierit të rregullt
dhe do të fërshëllente rruginave duke lexuar kartolinat?

Jo, teologët mesjetarë kontrollojnë oborrin. Pyetja e vetme që ju dëgjoni pëherë është pista e vogël e vallëzimit mbi kokën e një gjilpëre
ku kurorëzat e dritës janë të destinuara të takohen dhe të lëvizin në mënyrë të padukshme.

E krijuar për të na bërë të mendojmë në miliona, në miliarda,
të na mbarojnë numrat dhe të shembemi në pafundësi,
por ndoshta përgjigjjia është thjesht një:
një engjëll femër që kërcen e vetme me këmbët me çorape,
një kombinim i vogël xhazi që vepron në sfond.

Ajo lëkundet si një degë nëpër erë,
me sytë e saj të bukur të mbyllur
dhe basisti i gjatë e i hollë përkulet të shohë orën
sepse ajo ka qenë duke kërcyer gjatë gjithë kohës
dhe tani ka shkuar shumë vonë, madje edhe për muzikantët.

Përktheu: Arlinda Guma

Poezia e lexuar nga Arlinda Guma: