Një mbrëmje me shi në Tiranë-Arlinda Guma

 

Një mbrëmje me shi në Tiranë,

është moti i duhur

për të kërkuar rrugëve humbjet e tua të bukura…

 

Nëpër strehët e shtëpive që pikojnë ëmbëlsisht,

në fytyrat e neonëve që pulisin sytë dhimbsurisht,

në kuvertën e ngrohtë prej gjethesh,

që vjeshta ta hedh krahëve si mushama shiu…

 

Një mbrëmje me shi në Tiranë,

është moti i duhur

për të kërkuar rrugëve humbjet e tua të bukura,

të pikasësh nëpër rrëkeza uji ndonjë gjurmë të vagullt të tyre,

t’i ndjekësh pas derisa të bëhen hije,

e pastaj të veshësh sytë me natë,

 

ndërsa retë, si kirurge me përvojë,

nxjerrin prej sirtarëve arsenalin e tyre të murrmë të bisturive,

dhe nxitojnë të t’i mjekojnë drithmëzat e melankolisë.

– Ca cifla të vockla në kraharor…

– Asgjë e jashtëzakonshme!- të thonë ato me zë të sigurt,

si profesionistët pas një operacioni.

…

Një mbrëmje me shi në Tiranë,

është moti i duhur

për të kërkuar rrugëve humbjet e tua të bukura…

për të fortifikuar butë muret e zemrës,

e për të mashtruar dhimbjet…

 

©Arlinda Guma

Tiranë, 4 Shkurt, 2019

Poezia e lexuar nga Arlinda Guma: