Elegji për nënën-Frederik Rreshpja
Një avion ikën tutje përmes mjegullave
Si fatkeq i përzënë nga selia e zotave.
Ah, ku ke rënë kështu, ku je tretur!
Ka mbirë bari nga sytë e tu,
Ka mbirë bari nga zëri yt.
Nga kodrat po vjen nata duke u lutur për ty.
Është koha kur hijet bien mbi gjunjë.
E ti rri aty nën tokë
Te mermeri i rrëzuar i perëndive.
Tani që ti nuk je, dafina nuk gjelbëron më
Vetëm zëri im i djalërisë jehon mbi gjethet e verdha
E dafina vemdos kurora mbi lavdinë e muzgut.
Ishte një botë e tërë kur ishe ti
Por erdhi kjo vetmi e madhe që fshin gjithçka.
Tani vetëm diku në horizont
Bëjnë kryq vetëtimat e nxjerrin thikat.
Ah, ku ke rënë kështu, ku je tretur!
Nënë, nënë! Do të vinë dëborërat,
Do të bien mbi barin që ka mbirë nga zëri yt…
Nënës-Frederik Rreshpja
Nënës-Frederik Rreshpja Nëna ime dhembje e pashuar,Ka kaq vjet që rri në dhé të zi,Edhe