Lajthi atomike-Sueton Zhugri

Ata që ndërtojnë një bombë bërthamore,
netët pa fund në format e projektimit, orë e orë të ndezura për
djegien e reaktorëve, përmasat minimaliste të tragjedive kimialiste,
përqendrimin e uranit të truve,
vetasgjësimin e principit njerëzor
të paqeve,
këta njerëz që përgatitin holokaustin
e përbashkët të rracës frymore. Këta njerëz që pas pune
bëjnë dashuri me gratë e tyre të bukura, shëtisin qentë e macet parqeve plot buzëqeshje
e përkëdhelin balluket e krijesave të tyre të njoma, krenarë si tingëllon në gojët e tyre të njoma fjala: babi,
e pra këta njerëz: vallë,
si natën i zë gjumi?

21.5.2018